إلي من يهمه الأمر إذكروا :
بلدي عزيز الكل بضحي من أجله والمشاكل الحاصله عليهو كلها بسبب التحرش الخارجي والحملات المعادية وكان :
علي الكهرباء الدافعين قروشها قبال ما تصلنا - هي ما جايه من موية نيلنا السوداني وطالعه من الرصيرص وسنار وديل حتهن كمان في السودان وعشان نحن سودايين مافي داعي للزعل وصرت البوز طالما خيرنا مننا وفينا 0
والمويه الجايانا من البحر واللا الحفير وان شاء لله من البير برضها مويه سودانيه وداخل بلدنا السودان وما بنزعل ، كان قطعوها مننا أو أدونا ليها صفيانه ولا عكرانه 0
والتعليم كان إتسجم وإترمد برضو مابنزعل ، المعلم ماسوداني كان إتكل علي الماهية ولا إشتغل بالخصوصيه ، والمنهج البدرسوه حتو كمان موسوداني ، الجهال والبنوت البتعلموه حتهن كمان سودانيين ، اه بعد ده كلو في طريقه نزعل بيها ، ماكلو سوداني × سوداني 0
المستشفيات والمستوصفات كان انعدمت فيها حبة البندول وكان زعلنا وكان طقينا برضها سودانية ، ونزعل كيفن منها والوالد والعم وكل الحبايب براجعوها وكلهم أهل وسودانيين , وما بنسي حريمنا وبناتنا البموتن في الولاده كمان سودانيات
والعمر عند الله ، وبعد مايموتن بندور نجدعن للكلاب ومن غير زعل رايحين وجايين دافننهن في السودان اه قولوا لي كيفن الطريقة للزعل 0
وبعدين كمان الجنوب ذاتو كان قالوا انفصل والله فت واحد فينا بزعل مافي والزعل الله لا جابو ماهم برضو اخوانا وسودانيين وين بروحو مننا كان طاروا السماء ياهن باقين لينا جيران والجيران مننا وفينا0
وكان قالوا دارفور بقت تشادية والشرق اتلم علي الحبوش برضوا ما بنزعل لاننا في النهاية وكان طال الزمن ولا قصر وكان اتفرقنا ولا اتلمينا نحن سوانيون والسودانيون أخوان وين ماكانوا
فإليكم يامن يهمهم الأمر إذكروا :
نحن السودانيون مشهود لينا ، وبالقليل راضين ، وكان في زول بحس بينا وشايل وجعتنا ما كان دى حالتنا ومنو فينا اقدر أقول البقرة فى الإبريق 0
بس الحمد لله والمزروعه من عنده في الزلط بتقوم والشكوي لغيره مزله 0
ابوالمعالي - الرياض
اليومية
